سەرهەنگ غەریب-هەولێر
بەرواری 28 و29 و30/3/2019، ماڵی سینەما بە هاوكاریی وەزارەتی ڕۆشنبیری و لاوان دووەمین فێستیڤاڵی فیلمی منداڵانی بەرێوەبرد، لە چوارچێوەی پرۆگرامەكانی دووەمین خولی فێستیڤاڵی فیلمی منداڵان، ڕۆژی پێنج شەممە 28 / 3 / 2019، كاتژمێر 11ی بەیانی لە هۆڵی ناوەندی لاوانی بەكرەجۆ 5 كورتە فیلم بۆ خوێندكارانی بەكرەجۆ نمایش كرا.
فیلمەكان بریتی بوون لە:- (كورتە فیلمی “كاڤۆك” دەرهێنانی (سیدات بەنەك)، ماوە : 15خولەك). كورتە فیلمی “هەموومانجوانین ” دەرهێنانی (بەرزان ئەیوب)، ماوە : 5 خولەك. كورتە فیلمی ئەنیمەیشنی” یەك لە هەزاران ” دەرهێنانی (باران رێحانی)، ماوە 8 خولەك. كورتە فیلمی” ئەدات لەسەر بانەكەمان ” دەرهێنانی (تەیمور قادری) ماوە 3 خولەك. كورتە فیلمی ئەنیمەیشنی” لوكسیان نەفەس ” دەرهێنانی (فەجار رامایل). هەمان ڕۆژ لە هۆڵی سینەمای منداڵانی كتێبخانەی گشتی،3 كورتە فیلم نمایشكران بۆ خوێندكاران كە بریتی بوون لە كورتە فیلمی (سەرۆك) دەرهێنانی (ژیوار فەرەج زادە)، كورتە فیلمی (شوێنەوار) دەرهێنانی (باران رێحانی)، كورتە فیلمی (پیاوی ژینگە) دەرهێنانی (بەرزان ئەیوب).
” منداڵ و سنیەما ”
لە چوارچێوەی پرۆگرامەكانی دووەمین خولی فێستیڤاڵی فیلمی منداڵان، بەرواری 28 / 3 / 2019، گفتوگۆیەكی تایبەت لەگەڵ دەرهێنەری منداڵ (ژیوار فەرەج زادە)، ئەكتەر (ئارسان بەرزان) سەبارەت بە ” ڕۆڵی منداڵ لە سینەمای كوردی ” بە ئامادەبوونی بینەرێكی بەرچاو لە منداڵان بەڕێوە چوو، هەریەك لە ژیوار و ئارسان تیشكیان خستە سەر گرنگی بەشداری و ڕۆڵی منداڵ لە فیلم و سینەمای كوردی، ئەزموونی كاركردنی خۆیان لە بواری فیلمسازی وەك ئەكتەر یان دەرهێنەر و ئەو ئاستەنگانەی هاتۆتە بەردەمیان و گرنگیی كاركردنی منداڵ و هێنانە ناوەوەیان بۆ بواری فیلمسازی و سینەما.
ئێوارەی 28 / 3 / 2019 بە دروشمی ” بەرەو گەشەی سینەمای منداڵ ” بە ئامادەبوونی وەزیری ڕۆشنبیری و میوانان ڕێوڕەسمی كردنەوەی فێستیڤاڵ دەستی پێكرد.
سەرەتای فێستیڤاڵەكە بە وتاری سەرۆكی فێستیڤاڵ (نما نەریمان) دەستی پێكرد، ئاماژەی بەوەدا كە سینەما گرنگی تایبەتی هەیە و لە فێستیڤاڵی فیلمی منداڵان ڕەنگی جیاواز و زمانی جیاواز و نەتەوەیی جیاواز بەشدارن و هەموویان فیلمیان لە بارەی منداڵ و مافی مرۆڤ و ژینگەوە دروست كردووە، هەر لە وتارەكەیدا هیوای خواست گرنگیی بدرێت بە بواری سینەمای منداڵان.
پاشان (خالید دۆسكی) وەزیری ڕۆشنبیری و لاوان وتارێكی پێشكەش كرد و تێیدا باسی لە گرنگی فێستیڤاڵی منداڵان و سینەمای منداڵ كرد، نموونەی ئەستێرەیەكی وەك (شیرلی تیمپلی) هێنایەوە كە چۆن لە تەمەنێكی منداڵیەوە توانی ببێتە شانازییەكی گەورە بۆ سینەمای ئەمریكی و جیهان.
دواتر 3 كورتە فیلم نمایشكران كە بریتی بوون لە (دووان لەیەك ژوور) دەرهێنانی (عومەر یاسین) لە عێراق، كورتە فیلمی (موسكویتا) دەرهێنانی (بریانڤینسینت) لە ئەمریكا، كورتە فیلمی (شوێنەوار) دەرهێنانی (باران ڕێحانی) لە ئێران.
لە فێستیڤاڵەكە 22 كورتە فیلم و فیلمی ئەنیمەیشن نمایش كران، كە فیلمەكان فیلمی پەروەردەیی و ژینگەیی و ئینسانی بوون و بەشێكی زۆریان لە لایەن دەرهێنەرانی كوردەوە بەرهەم هاتبوون و بەشێكیشیان لە لایەن دەرهێنەرانی بیانیەوە.
لەكۆی 22 كورتە فیلمەكەش 10 كورتە فیلمیان كێبركێیان لەسەر بردنەوەی خەڵات كرد لە لایەن لیژنەیەكی دادوەری هەڵسەنگاندنیان بۆ كرا كە پێك هاتبوون لە سینەماكار (كەریمۆك-كەریم غەفوور) كوردستان، خانمە سینەماكار (فاتوش یەڵدز) لە توركیا، خانمە سینەماكار (نینۆ باسیلیا) لە جۆرجیا.
بەرواری 30 / 3 / 2019، لە دواین ڕۆژی فێستیڤاڵ بە دابەشكردنی خەڵات بەسەر فیلمە سەركەوتووەكان كۆتایی هات.
دوای پێشوازی لە هەریەك لە سینەماكاران (كەریمۆك-کەریم غەفوور، فاتووش یەڵدز) بۆ سەر ستەیجی فێستیڤاڵ، ڕێزلێنانی فێستیڤاڵ لە لایەن (نمە نەریمان) سەرۆكی فێستیڤاڵ پیشكەش كرا بە لیژنەی داوەران و دواتر وتاری لیژنەی داوەری لەل ایەن بەرێز (كەریمۆك- كەریم غەفوور) سەرۆكی لیژنەی داوەران پێشكەش كراو دواتر لە لایەن لیژنەی داوەران خەڵاتەكان ئاشكرا كران كە بەم شێوەیە بوو : خەڵاتی یەكەم بۆ باشترین كورتە فیلم بەخشرا بە كورتە فیلمی (بوكە بە بارانێ) لە دەرهێنانی (قودرەت گونەش) لە وڵاتی فەرەنسا. خەڵاتی دووەم بۆ باشترین كورتە فیلم، بەخشرا بە كورتە فیلمی (مۆسكویتۆ) لە دەرهێنانی (بریانڤینسینت رۆدیس)، ئیرك چەینج لە ویلایەتەیەكگرتووەكانی ئەمریكا. خەڵاتی لیژنەی داوەران بەخشرایە ئەكتەر (ئارسان بەرزان) لە كورتە فیلمی (پیاوی ژینگە) لە دەرهێنانی بەرزان ئەیوب. هەروەها ڕێزلێنانی دادوەران بەخشرایە كورتە فیلمی (سەرۆك) لە دەرهێنانی (ژیوار فەرەج زادە). ڕێزلێنانی لیژنەی داوەران بەخشرایە كورتە فیلمی (قوڵینگی هاوین) لە دەرهێنانی (مەریەم سەمەدی).
