میدیاکار و چالاکوان نەریمان سابیر بە تۆمەتى “خراپ بەکارهێنانى مۆبایل” و لەسەر سکاڵایەکى رێکخراوى منداڵپارێزى کوردستان دەستگیر دەکرێت و نمای کچى داواى ئازادکردنى باوکى دەکات.
شاگوڵ رەئوف، دەستگیرکردنى نەریمان سابیرى هاوسەرى پشتڕاست دەکاتەوە و دەڵێت: “دواى بڵاو بونەوەى بەرنامەیەکى تەلەفزیۆنى لەسەر تۆڕە کۆمەڵایەتییەکان کە تێیدا باس لە چالاکییەکانى نما نەریمان کرابو، دواتر رێکخراوێک بەناوى داکۆکیکردن سکاڵاى لەسەر نەریمان تۆمار کرد و دواتر پۆلیس دەستگیرى کرد”.
لاى خۆیەوە نما نەریمان ڤیدیۆیەکى لەسەر دەستگیرکردنى باوکى و سکاڵاکەى رێکخراوى منداڵپارێز بڵاوکردەوە و جگە لە داواکاری بۆ ئازادکردنى باوکى دەڵێت: “باشترە ئەو رێکخراوە بچێت منداڵانى سەر شەقام بپارێزێت و هاوکارى ئەو منداڵانە بکات کە لە سەر خۆڵ و خاشاک دەژین”.
نەریمان سابیر، ئەندامى لقى سلێمانى سەندیکاى رۆژنامەنوسانە و بەپێى زانیارییەکان بە پێى مادەى دو لە یاساى خراپ بەکارهێنانى ئامێرەکانى پەیوەندیکردن لەلایەن رێکخراوى منداڵپارێزەوە سکاڵاى لەسەر تۆمار کراوە.
